Консерватория жаңалықтары

2023 жылдың 5 мамырында, 9 мамыр – Жеңіс күні қарсаңында, Құрманғазы атындағы Қазақ ұлттық консерваториясы «Музыкалық білім беру және психология» кафедрасының ұстаздары Алматы қаласының М. Әуезов атындағы №128 жалпы білім беретін орта мектебінде «Жүректерді музыкамен толтырайық» деген атпен есептік концерт өткізді. Концертке профессор Л.Т. Калиакбарова, доцент Е.Т. Үсенбаев, оқытушы Э.В. Пак, аға оқытушы Д.Р. Шабденова сыныптарының студенттері қатысты. М. Ералы, А. Елемесова, Л. Казимова, А. Сатқынбай, Ә. Сәрсенбай, Ш. Отунчи, Е. Қиса, А. Тыныбековалар негізгі аспаптарда өнер көрсетіп, музыкалық шығармаларды мектеп оқушылары мен ұстаздардың назарына ұсынды. Олар: Құрманғазы «Адай», Жантөре «Шалқыма», Қазанғап «Он сегіз жасар Балжан қыз» күйлері мен Н. Меңдіғалиев «Поэма – легенда о домбре», Е.Үсенов «Шамші-Дастан», «Кербез сұлу», Қ. Ахмедияров «Арпалыс», А.Тондер «Syiahamba», Сағат «Талшын», Ф. Шопен Ноктюрн до-диез минор, «Қамажай» әніне Л. Борисованың вариациялары, Фибих «Поэма», О. Туссен «Ностальгия», Я.Френкель, Р.Гамзатов «Журавли» және Ә.Алпысбаевтың «Әке арманы».

Құрманғазы атындағы Қазақ ұлттық консерваториясының"Ішекті аспаптар" мамандығында оқитын 1-курс студенті Мадина Асхат (альт) Парижде өткен А. Глазунов атындағы XII Халықаралық байқауда 1 орынды иеленіп, лауреат атанды. Ұстазы - доцент Н.Е. Сағымбаев.

2023 жылдың 10 мамырында Құрманғазы атындағы Қазақ ұлттық консерваториясының Е.Рахмадиев атындағы үлкен концерт залында "Ер есімі ел есінде" атты кураторлық сағат өтті. Бұл жолы кураторлық сағат ауған соғысының ардагерлерімен сыр-сұхбат форматында өтті. Жиынды консерваторияның тәрбие және әлеуметтік жұмыстар жөніндегі проректоры Мұхамбет Ашхатұлы бастап, сыйлы қонақтарды таныстырды.

«Музыкалық білім беру» мамандығының 3-курс студенті Талипова Дильбаргүл «Tashkent Music Festival» халықаралық байқауында I дәрежелі лауреат атанды. Оқытушысы – Элеонора Пак.

2023 жылдың 5 мамырында Құрманғазы атындағы Қазақ ұлттық консерваториясының А.Жұбанов атындағы концерт залында «Жалпы фортепиано» кафедрасының аға оқытушысы Т.О. Жангуттина сыныбының концерті өтті.

2023 жылдың 5 мамырында Құрманғазы атындағы Қазақ ұлттық консерваториясының Е.Рахмадиев атындағы Үлкен концерт залында Қазақстанның еңбек сіңірген артисі, профессор Жалғасбек Бегендіковтің 70 жылдық мерейтойына арналған шығармашылық концерт өтті.

Құрманғазы атындағы Қазақ ұлттық консерваториясының Ғылыми-ақпараттық кітапхана қызметі 9 мамыр – Жеңіс күніне арналған «ЖАСА, ЖЕҢІС МӘҢГІЛІК!» атты көрме дайындады.      

2023 жылғы 2-5 мамыр аралығында кәсіби бағдар беру жұмысы аясында Құрманғазы атындағы Қазақ ұлттық консерваториясының оқытушылары Айгалкаева Ботагоз Багдатқызы – «Арнайы фортепиано» кафедрасының доценті, Мәдениет саласының үздігі, Халилова Қорлан Маратқызы – «Ішекті аспаптар» кафедрасының аға оқытушысы, өнертану ғылымдарының магистрі, Иманбаев Азамат Қапуханұлы – «Үрмелі және ұрмалы аспаптар» кафедрасының оқытушысы, өнертану ғылымдарының магистрі, қабылдау комиссиясының жауапты хатшысы Абдуллиндер атындағы Шығыс Қазақстан музыкалық училищесіне (Өскемен), М.Төлебаев атындағы музыкалық училищеге (Семей) және Дарынды балаларға арналған музыкалық мектеп – интернатқа (Павлодар) барып, шеберлік сыныптарын және үш оқу орнының түлектерімен кездесу өткізді.

2023жылдың 30 сәуірі мен 5 мамыры аралығында Құрманғазы атындағы ҚҰК «Аспаптық орындаушылық» факультетінің деканы, PhD докторы, доцент Бекенова Айжан Сіләмқызының жетекшілігімен, өнертану ғылымдарының магистрі, «Арнайы фортепиано» кафедрасының аға оқытушысы Дүйсембаева Рабиға Сыдыққызы, сондай-ақ Қазақстанның Еңбек сіңірген қайраткері, «Үрмелі және ұрмалы аспаптар»  кафедрасының профессоры Ерманов Жанат Рахметоллаұлы Қызылорда, Шымкент, Тараз қалаларындағы арнайы-орта музыкалық мекемелері түлектеріне кәсіптік бағдар беру іс-шаралары мен шеберлік сыныптарын өткізіп қайтты.