Бибігүл Төлегенова атындағы ХІІ Халықаралық вокалистер байқауы өтті

Қазылар алқасының төрайымы қазақ халқының маңдайына біткен жұлдызы, әнші Бибігүл Төлегенованың өзі болды. Сондай-ақ, байқауда бақ сынаған өнерпаздардың орындаушылық шеберліктерін ҚР халық артисі, ҚР Мемлекеттік сыйлығының лауреаты, Құрманғазы атындағы Қазақ ұлттық консерваториясы «Дирижерлеу» кафедрасының меңгерушісі, профессор Базарғали Жаманбаев, Халықаралық конкурстар лауреаты Елена Заремба (Люксембург), Форо Бонапарттағы музыка академиясының профессоры Анатолий Гусев (Италия), Коми Республикасының халық артисі, Прага операсының солисі, Мемлекеттік сыйлықтың лауреаты, Дамир Басыров (Чехия), Грэмми сыйлығының лауреаты, Фанодағы Вирджинио Федели Театро делла Фортуна қорының көркемдік жетекшісі (Италия), Мәскеу қалалық педагогикалық университетінің мәдениет және өнер институтының доценті – Цзян Шанжун (Қытай) сынды өнер майталмандары бағалап, төрелік етті.

https://www.youtube.com/watch?v=3JvSryC3QPI

Аталмыш байқауда әлемнің 11 елінен 66 қатысушы бақ сынасты. Сонымен қатар бұл өнер додасына Құрманғазы атындағы ҚҰК жоғары курс студенттері, атап айтсақ, Алпысбаева Аружан (аға оқытушы Т.К.Бекназарова сыныбының білім алушысы), Кенжеғалиқызы Сағыныш (доцент Т.А.Смайлова сыныбы), Раис Данияр (аға оқытушы Б.Н. Жомартов сыныбы), Жақып Ұлан (оқытушы И.М. Артағалиев сыныбының білім алушысы) және Тұрсынбай Бердәулет (доцент С.А. Нұрғалиеваның сыныбы) қатысып, вокалдық шеберліктерінің осал емес екенін дәлелдеді.