Консерваториясының ректоры Гаухар Тасбергенова Bösendorfer компаниясының бас директоры Сабина Грубмюллермен кездесті

Құрманғазы атындағы Қазақ ұлттық консерваториясының ректоры Гаухар Тасбергенова Bösendorfer фортепиано компаниясының бас директоры Сабина Грубмюллермен кездесті. Кездесу Австрияда қабылдаушы тараптың шақыруымен өтті.

Әңгіме барысында ынтымақтастықтың болашағы, ең алдымен, білім беру мен мәдениет саласындағы бастамалар талқыланды. Ортақ бағдарламалар мен тағылымдамалар ұйымдастыру, академиялық және шығармашылық алмасулар өткізу, сондай-ақ рояль шеберлеріне арналған оқыту курстарын жүзеге асыру мүмкіндіктері қарастырылды. Сонымен қатар оқу және концерт залдарын Bösendorfer-дің жоғары деңгейлі аспаптарымен жабдықтау мәселесі қозғалды. Компания өкілдері модельдердің техникалық сипаттамалары, жеткізу шарттары және сервистік қолдау жүйесі жөнінде мәлімет берді.

Сапар аясында консерватория өкілдері фортепиано өндіріс фабрикасына барды. Айта кетерлігі, шеберлер қатарында әйелдер де еңбек етеді, бұл кәсіптің зергерлік нақтылық пен нәзік шеберлікті талап ететінін айқындайды.

Bösendorfer – Еуропадағы ең көне әрі беделді фортепиано брендтерінің бірі. Ол 1828 жылы Венада құрылған. Бүгінде бұл аспаптар терең әрі бай үні үшін бағаланып, әлемнің жетекші пианистері тарапынан қолданылады. Bösendorfer рояльдері әлемдегі ең танымал концерт залдарында, соның ішінде әйгілі Wiener Musikverein сахнасында шырқалады.

Құрманғазы атындағы Қазақ ұлттық консерваториясы халықаралық байланыстарды стратегиялық тұрғыда дамытып, материалдық-техникалық базасын жаңартуды жалғастырып келеді. Осы бағытта ол әлемнің жетекші өндірушілерімен әріптестікті нығайтуда.