Өнер майталмандарымен кездесу өтті

         2-қазан күні Құрманғазы атындағы Қазақ ұлттық консерваториясының кіші залында ректор А.Жүдебаевтың қатысуымен Саха елінен келген танымал хомусшы, "Әлем виртуозы" атағының иегері Юлияна Кривошапкинаның шеберлік-сыныбы өтті. Түбі бір түркі халықтарының мәдениеті әр алуан болғанымен ұқсас тұстары да жетерлік. Хомус пен қазақтың шаңқобызы бір аспап екені баршаға аян. Алайда саханың хомусы аспаптың жасалуы жағынан да, орындаушылық деңгейі жағынан да көш ілгері екені мәлім.
         Өз өнерімен талай елдерді аралап тыңдаушысын тәнті етіп жүрген Юлиянаның консерватория қабырғасында шеберлік-сыныбын өткізуі шаңқобыз аспабында орындаушылықтың дамуына өз септігін тигізері даусыз.





         Сахалық қонақпен болған басқосу консерваториямызда 40 жыл ұстаздық еткен, қазіргі таңда Астана қаласында қызмет жасап жүрген белгілі фольклортанушы, күйші-ұстаз, профессор Айтжан Тоқтағанмен болған еркін сұхбат форматындағы кездесуге ұласты. "Күй тәңірдің күбірі", "Күй керуені", "Күй қастерлі әуез", "Атыраудың 62 Ақжелеңі" сияқты келелі еңбектердің авторы Айтжан аға, күйшілік өнердің өткені мен бүгіні туралы, дәстүр жалғастығы туралы сөз қозғады.
         Жиынға қатысқан "Халық музыкасы" факультетінің ұстаздары мен студенттері қонақтарды сұрақ астына алып, көп дүниеге қанық болып қайтты.