Консерватория жаңалықтары

2020 жылдың 19 ақпанында Құрманғазы атындағы Қазақ ұлттық консерваториясында Абай Құнанбайұлының 175 жылдық мерейтойына арналған «Жас ғалымдардың сөзі: өнертанудың өзекті мәселелері» атты II Республикалық магистрлік оқулары өтті.
Осымен екінші жыл қатарынан ұйымдастырылған бұл шараның негізгі мақсаты магистрлік зерттеу материалдарының өзектілігін тексеру, жұмыстардың теориялық және практикалық нәтижелерінің ғылыми тұжырымдамасын жасау, заманауи ғылыми ақпараттармен бөлісу.
Қатысушылар жоғары оқу орындарының шығармашылық мамандықтарында ізденіп жүрген жас ғалымдар.
Магистрлік оқуларының қорытындысы бойынша қатысушыларға әртүрлі номанациялар бойынша дипломдар мен сертификаттар табысталды. Диплом иелерін  қазылар алқасы анықтады.

Қазылар алқасы:
Төраға – Бердібай А.Р. - «Музыкатану және композиция» кафедрасының доценті, PhD;

1. Қайырбекова Ә.Ғ. - «Әлеуметтік-гуманитарлық пәндер» кафедрасының меңгерушісі, ф.ғ.д., доцент;

Бұлтбаева А.З. - «Музыкатану және композиция» кафедрасының доценті (ЖАК), ө.к.;

Байбосынова Ұ. М. - «Халық әні» кафедрасының оқытушысы, ҚР Еңбек Сіңірген қайраткері, Францияның әдебиет және өнер орденінің иегері, жырау, ф. ғ. к.;

Тілеубергенов А.А. - «Фортепиано» кафедрасының доценті, PhD, ҚР еңбек сіңірген қайраткері;

Мылтықбаева М. Ш. - «Музыкатану және композиция» кафедрасының доценті, ө.ғ.к.;

Жәменкеев Е.Е. -  «Халық музыкасы» факультетінің деканы, PhD.

2020 ж. 07.01.- 15.06. аралығында  «Аспаптық орындаушылық» факультетінің 2-3  курс студенттері  Белгібаев Шыңғыс пен Омар Ақниет   академиялық ұтқырлық бағдарламасы аясында  Берген Университетіне (Норвегия) оқуға жіберілді. Бұл  «Музыка және орындаушылық саласындағы Еуразиялық ғылыми-зерттеу қауымдастығы/Music and Artistic Research Knowledge Network Eurasia CPEA-LT-2016/10082» халықаралық жоба негізінде жүзеге асырылады.

Таяуда академиялық ұтқырлық аясында «Аспаптық орындаушылық», «Музыкатану, арт-менеджмент, әлеуметтік және гуманитарлық пәндер» факультеттерінің 2-3 курс студенттері К. Липинский атындағы Музыкалық академиясынан (Вроцлав қ-сы, Польша) бір семестр көлеміндегі оқуын аяқтап елге оралды.

Құрманғазы атындағы Қазақ ұлттық консерваториясының 2019-2020 оқу жылына арналған тәрбие жұмысының жоспарына сәйкес, 2020 жылдың 12 ақпанында консерваторияның кіші залында «Діни экстремизм мен терроризмнің алдын алу» тақырыбында Терроризмге қарсы дайындық орталығының қызметкері, дінтанушы Шоманов Болат Шаймолдаұлының консерватория студенттерімен кездесу сағаты өтті.  Кездесу барысында  студенттерге діни экстремизм мен терроризмнің мағынасы түсіндіріліп, заңсыз  діни ұйымдар туралы кеңінен мағлұмат берілді. Ұйымдастырушылардың айтуы бойынша бұл кездесудің негізгі мақсаты студенттерге қоғамның әлеуметтік, құқықтық, діни сипаттарын ұғындыра отырып, оларды террорлық, лаңкестік және діни экстремистік бағытта арандатуға жол бермеу,  қоғамға жат қылық - лаңкестіктен аулақ болу керектігін, бейбітшіліктің маңызын түсіндіру.

Enactus Халықаралық ұйымының Қазақстандағы «Enactus Kazakhstan» Ұлттық кеңсесі 2020 жылдың 8-9 сәуірінде Нұр-Сұлтан қаласында жыл сайынғы студенттік кәсіпкерлік, стартап және инновация Enactus Kazakhstan National EXPO 2020 Ұлттық кубогы өтетінін хабарлайды.

2020 жылдың 12 ақпанында консерватория кітапханасының оқу залында «Электрондық кітапхананың мүмкіндіктер жүйесі: мазмұны, қызмет көрсету стратегиясы, дамудың негізгі перспективалары» тақырыбында «Гребенников» баспасының директоры Аркадий Халюковтың қатысуымен семинар өтті.
Мәскеулік қонағымыз Құрманғазы атындағы Қазақ ұлттық консерваториясының ұстаздары мен студенттеріне 31 НАУРЫЗҒА ДЕЙІН мына сілтеме бойынша http://grebennikon.ru GREBENNIKON ЭЛЕКТРОНДЫҚ КІТАПХАНАСЫНА тестік режимде тегін кіріп, мақалалар мен бейнематериалдарды көру мүмкіндігін жасап отыр.
«Гребенников» баспасы маркетинг, менеджмент, қаржылық менеджмент және персоналды басқару бойынша журналдар мен кітаптар шығарады.
Құрметті ұстаздар қауымы және студенттер! Осындай мүмкіндікті жіберіп алмай, өздеріңізге керек ақпаратты алуға асығыңыздар.
Құрманғазы атындағы ҚҰК кітапханасы
e-mail: nibs_lib@mail.ru,
тел.+7 (727) 272 55 01, (114)

2020 жылдың 11 ақпанында Құрманғазы атындағы Қазақ ұлттық консерваториясының Үлкен концерт залында Хәкім Абайдың 175 жылдығына арналған Халықаралық және Республикалық байқаулардың лауреаты, консерваториямыздың ұстазы Ғалымжан Нарымбетовтың жеке концерті өтті.  
Концерт залында ине шаншар орын болған жоқ. Бұл кешке жиналған көпшілік қазақстандық және шетел композиторларының ең үздік шығармаларын тыңдады. Олардың ішінде А. Құнанбаев, Ықылас, И.С.Бах, В. Черников, П. Макконен, В. Семенов, А. Жайым, А. Пьяцолла, В. Гридин, А. Шалаев, Р. Гальяно және т.б. туындылары бар.
Әлемдегі мәдени-рухани жаңалықтар, өнердегі шоу-эксперимент мына біздің ұлы даладан тарағандай көрінеді. Кез келген жиын-той, мерекені ән-күйсіз елестету мүмкін емес. Бұл кеште көрермендердің есінде қалған ерекше дүниелердің бірі - Күй тартыс. Біз осыған дейін домбыраның, қобыздың күй тартысына қанық болып жүргеніміз рас. Ал Ғалымжан Нарымбетов (баян), Алмат Сайжан (қыл қобыз), Таңат Сәденов (домбыра), Арман Жайымның (фортепиано) орындауындағы «Күй тартысы» көпшіліктің есінде қалары сөзсіз. Концерт соңында көрермен қауым өнерпаздың өнерін жоғары бағалап, зор қошеметке бөледі.
Біз өз кезегімізде әріптесімізге зор денсаулық және шығармашылық табыс тілейміз.

2020 жылдың 7 ақпанында  Құрманғазы атындағы Қазақ ұлттық консерваториясының Шопен атындағы камерлық залында ҚР еңбек сіңірген мәдениет қайраткері, Құрмет орденінің иегері, Шу ауданының құрметті азаматы, ақын, термеші, сазгер Аяз Бетбаевтің шығармашылығына арналған «Сауытбектің сарқыты – Аяз ақын» атты жинақтың тұсаукесері өтті. Кешке келген қонақтар Жамбыл мен Кененнің ізін жалғаушы, жыршы, термеші, ақын - Аяз Бетбаевті ыстық естеліктермен еске алып, жазылған еңбекке құттықтау тілектерін білдірді. Қонақтардың қатарында                                Аяз Бетбаевтің жары Г. Сауырбайқызы, жыршы Әбіш Әділбеков, кафедрамыздың оқытушылары А.Бердібай, И.Қожабеков, студенттер мен шәкірттер болды. Жинақты дайындаған «Музыкатану» факультетінің 2-курс магистранты Искаков Жұлдыз. Шара барысында «Аязға арнау» толғауымен Аяз ақынның шәкірті Бекарыс Көштаев ән шырқап, халық әні «Жеңеше-ай» әнімен Бек Нуридинұлы қонақтардың қошеметіне бөленді. Сондай-ақ Жұлдыз Искаков анасы мен ұстаздарына алғыс білдіріп, кітаптың мазмұнымен таныстырып, келген қонақтарға кітаптарын сыйға тартты.

Ағымдағы оқу жылында академиялық ұтқырлық аясында «Аспаптық орындаушылық» факультетінің 2 курс студенттері Әбілсейіт Аружан және Жақсыбек Томирис Виго консерваториясынан (Виго қ-сы, Испания) бір семестрлік оқуын аяқтап оралды.
Мұндай шара «Эразмус+» бағдарламасы бойынша жүзеге асырылады, мұнда студенттер үшін шәкіртақы мен барлық шығындардың төлемі қарастырылған.