Консерватория жаңалықтары

2023 жылдың 22 ақпанында Құрманғаз атындағы Қазақ ұлттық консерваториясының А. Жұбанов атындағы концерт залында Халық музыкасы факультеті «Домбыра» кафедрасының үш ішекті және фольклорлық аспаптары ұстаздарының «Замана сазы» атты концерті өтті.

2023 жылдың 22 ақпанында консерваторияның Е. Рахмадиев атындағы үлкен концерт залында кураторлық сағат аясында өнер-білім ордасының студенттерімен Педагогикалық ғылымдар академиясының психологы Исабекова Эльмира Кужатқызы ханыммен кездесу өтті.

Құрметті өнерсүйер қауым!
Сіздерді «Алатау» дәстүрлі өнер театрының артисі, «Алатау» этно-фольклорлық ансамблінің мүшесі, Н. Тілендиев атындағы АФЭ «Отырар сазы» оркестрінің артисі, А. Жұбанов атындағы дарынды балаларға арналған РҚМММИ ұстазы, Құрманғазы атындағы Қазақ ұлттық консерваториясының 4-курс студенті, Халықаралық және республикалық байқаулардың лауреаты, күйші Дастан Қазкеновтің «Домбыра – Дастан» атты шығармашылық кешіне шақырамыз!

Алматыда 2023 жылғы 2 наурызда ұлы балерина Майя Плисецкаяға және оның белгілі француз балетмейстерімен, жазушыларымен және сәнгерлерімен серіктестікке арналған Дамир Оразымбеттің ашық дәрісі өтеді. Дәріс «Өнер тәрбиесі» жобасының бір бөлігі саналады – тыңдаушыларға балет әлемі жаңа қырынан көрінетін хореографиялық өнер тарихы туралы ашық кездесулер-әңгімелер циклінен тұрады.

Құрманғазы атындағы Қазақ ұлттық консерваториясының Аспаптық орындаушылық факультеті Сіздерді 2023 жылғы 2 наурыз күні Құрманғазы атындағы Қазақ ұлттық консерваториясының конференц-залында өтетін «Орындаушылық өнер дәстүрлері: бароккодан қазіргі заманға дейін» атты Халықаралық ғылыми-әдістемелік семинарға қатысуға шақырады. 

«Арт-менеджмент» мамандығының 2-курс студенті Кимран Раушан Ресейдің «Новая наука» халықаралық ғылыми серіктестік орталығының ұйымдастыруымен өткен «Жоғары мектептің ғылыми жетістіктері 2023» ғылыми-зерттеу байқауында «Өнертану» номинациясы бойынша I дәрежелі дипломға ие болды.

Бүгін Құрманғазы атындағы Қазақ ұлттық консерваториясының мәжіліс залында өнер-білім ордасында білім алып жатқан белгілі санатқа жататын студенттермен кездесу өтті. Қазақстан Республикасындағы мүмкіндігі шектеулі жандардың өмір сүру сапасын қамтамасыз ету және жақсарту жөніндегі ұлттық жоспарға сәйкес өткізілген жиында консерваторияның Тәрбие және әлеуметтік жұмыстар жөніндегі проректоры Ешмұханов Мұхамбет Ашхатұлы ерекше қызмет алу қажеттіліктері бар студенттермен кездесіп, олардың арзу-тілектерін тыңдап, заң аясында қарастырылған жеңілдіктер және консерватория тарапынан жасалып отырған мүмкіндіктер туралы түсіндірме жұмыстарын жүргізді. Кездесу барысында аталмыш көмекке мұқтаж студенттер өз ойларын ортаға салып, жасалып жатқан қамқорлықтары үшін консерватория басшылығына ризашылықтарын білдірді.

2023 жылдың 16 ақпанында Құрманғазы атындағы Қазақ ұлттық консерваториясында ӘГП кафедрасы, «Қазақ және шетел тілдері» секциясының ұйымдастыруымен, халық жазушысы, қоғам қайраткері Шерхан Мұртазаның 90 жылдық мерейтойына арналған «Сөз өнерінің хас шебері» атты дөңгелек үстел өтті.

Консерваториямыздың 3-курс студенті Нұралы Күнғалиев пен ҚР Еңбек сіңірген қайраткері, Үрмелі және ұрмалы аспаптар кафедрасының профессоры Жанат Рахметоллаұлы Ерманов 2023 жылғы ақпанның 10 мен 13 күндері аралығында Дубай қаласында өткен кларнетшілерге арналған «Yamaha Music Gulf» стипендиялық бағдарламасының финалына қатысып қайтты. Шараның мақсаты – жас талантты орындаушыларды олардың шығармашылық қуатын жүзеге асыруға және олардың кәсіби музыкалық каръерасын одан әрі дамытуға қолдау көрсету арқылы музыкалық мәдениеттің дамуына үлес қостыру.