Консерватория жаңалықтары

2019 жылдың 8-16 наурыз аралығында Татарстан Республикасы Қазан қаласында өткен «SFORZANDO», «ЗОЛОТАЯ ЛИРА» және С. Сайдашев атындағы халықаралық фестивальдар мен байқауларда екі мәрте лауреат атанып (І орындар) және бірінде дипломға ие  болған  халық музыкасы факультеті «Домбыра» кафедрасының 2 курс студенті Тигай Кристинаны жеңісімен шын жүректен құттықтаймыз!

Ұстазы профессор Ерсайын Басықара

  2019 жылдың 9-24 наурыз аралығында Сауд Арабиясында өткен Еуразиялық экономикалық ынтымақтастық ұйымының бастамасымен «WORLD FOLK.VISION»»  дүниежүзілік ұлттық мәдениет пен өнер фестивалі және  халықаралық «Nomad universe 2019» этнофестивалінің  финалында «Этно-музыка» номинациясы бойынша «ХАССАҚ» этно-фольклорлық ансамблі Бас жүлдеге ие болды.

2019 жылдың 25 наурызында Құрманғазы атындағы Қазақ ұлттық консерваториясында әнші, жазушы, Қазақстан Республикасының еңбек сіңірген артисі  Жәнібек Кәрменұлының 70 жылдығына арналған  «ӘНІҢНІҢ БАҒА ЖЕТПЕС БҰРМАСЫНА» атты еске алу кеші өтті. 

Елордамыздың Тұңғыш Президентіміздің атымен аталуы тарихи оқиға болып тұр. Әлем тарихында оның мысалы бар. Солардың бірі АҚШ-тың қазіргі бас қаласы Вашингтон. Тәуелсіздік алған алғашқы уақытта әлеуметтік-экономикалық, саяси ахуалымыз өте қиын 90 жылдары елордамызды сол кездегі Ақмола қаласына көшіру туралы Нұрсұлтан Әбішұлының сол кездегі шешіміне көпшілік қолдау білдірмеп еді. Тәуелсіз Республикамыз үшін жасаған басқа істерін айтпағанда, қазіргі таңда сол шешімнің Қазақ елінің егемендігінің нығаюына, жер тұтастығының сақталуына кепіл болғанын уақыттың өзі дәлелдеп берді. Арқаның төсінде көрсең көзің тоятын Астанадай елордамыз бой көтерді. Еліміздің орталығы мен солтүстік аймағында қаракөздеріміздің үлесі артты. Тұңғыш Президентіміздің сол көрегендігі үшін елордамызға Елбасының атын беру туралы шешім өте орынды деп есептеймін.

Елбасымыздың өз қызметін тоқтату туралы шешімі күтпеген жағдай болды.
28 жыл Тәуелсіз елімізді басқарып келген көреген Елбасымыз тұрақтылық пен келісімді серік қылған жас мемлекетіміздің Тұңғыш Президенті ретінде өзіне жүктелген міңдетті абыроймен орындап, Қазақстанды әлем мойындаған елге айналдырды. Ендігі жерде ұстанған бағытымыз, қойған мақсаттарымыз айқын.

2019 ж. 11-16 наурыз аралығында Құрманғазы атындағы Қазақ ұлттық консерваториясының ректоры Жудебаев А. А. және ректор кеңесшісі Скаков Е.Ж. Краковтағы Музыка Академиясында  (Краков қ., Польша) іссапарда болып қайтты.
      Аталмыш іссапар "Эразмус +" бағдарламасы аясында жүзеге асырылды.  Іссапар барысында ректор Құрманғазы атындағы Қазақ ұлттық консерваториясы тарихы туралы таныстырылым жасап, Қазақстан композиторларының академиялық музыкасындағы халық музыкалық шығармашылығының ықпалы тақырыбында дәріс оқыды. Сондай-ақ, дирижерлеу мастер-класстары мен Академия студенттерінің  дәрістеріне  қатысты.
      Краков қаласындағы іссапар барысында  ректор және ректор кеңесшісі  академия басшылығымен кездесіп, Консерваторияның студенттері мен оқытушыларының академиялық оралымдылық бойынша түрлі бағдарламаларға қатысу мүмкіндігі туралы, сондай-ақ екі жоғары оқу орындарының арасындағы тәжірибе алмасу мәселелерін талқылады.

Бүгін Құрманғазы атындағы Қазақ ұлттық консерваториясының студенттері  Алматы қаласының метрополитенінде Наурыз мейрамына арналған «Дәстүрлі музыка шашуы» атты музыкалық флешмоб акциясын ұйымдастырды.
Музыкалық флешмобтың мақсаты – қазақ халқының музыкалық мұрасын дәріптеу, тыңдаушылардың бойында өз елінің музыкалық мәдениетіне деген  мақтаныш сезімін қалыптастыру, жас орындаушылардың шығармашылық әс-әрекетін дамыту.

Шараға 40-тан астам студент қатысып, мұндай шара алдағы уақытта өткізіліп тұрса деген ниеттерін білдірді.

Кеше 2019 жылдың 17 наурызында Алматыда М.Әуезов атындағы Қазақ мемлекеттік академиялық драма театрында ҚР Мәдениет және спорт министрі Арыстанбек Мұхамедиұлының бастамасымен «Ұлы даланың ұлы күні – НАУРЫЗ» мейрамы салтанатты түрде кеңінен аталып өтті.
Наурыз – ежелгі заманнан қалыптасқан жыл бастау мейрамы, айрықша тәлім-тәрбиелік, үлгі-өнегелік, сән-салтанаттық мейрам. А. Мұхамедиұлы бұл мерекені балалардың көз қуанышына айналдырып, оқушылардың үшінші тоқсандық демалысын наурыз мерекесіне үйлестіру, Наурыздың  атрибуттық белгісі, эмблемасы һәм символикасын бекіту, осы мейрам аясында тал егу, көрісу, мерекені заманауи ұлттық киімдермен қарсы алу, т.б құндылықтарды дәріптеу керектігін алға тартты.
М. Әуезов театры алаңындағы ҚР Мәдениет және спорт министрлігіне қарасты мәдени ошақтардың бірлескен ауқымды шарасы Көрісу дәстүрімен басталып, қазақ өнері саңлақтарының қатысуымен өткен Наурыз тойы қолөнер шеберлерінің жәрмеңкесіне, ұлттық ойындар мен мерекелік-концерттік бағдарламаға ұласты.

2019 жылдың 13 қазаныңда Құрманғазы атындағы Қазақ ұлттық консерваториясының үлкен концерттік залында ҚР Мәдениет қайраткері, әнші Қанат Құлымжановтың 75 жылдық мерейтойына арналған «Самға дауысым» атты концерт өтті.