Консерватория жаңалықтары

2019 жылдың 5 сәуірінде Құрманғазы атындағы Қазақ ұлттық консерваториясының Ф.Шопен атындағы камералық залында Қазақстан Республикасының халық артисі, профессор Ғалия Молдакаримованың «Көктем әуені» атты жеке концерті өтті.

Қазақстан Республикасы Білім және ғылым министрлігі, Қазақстан Республикасы Тұңғыш Президенті – Елбасының қоры және Құрманғазы атындағы Қазақ ұлттық консерваториясы бірлесіп ұйымдастырып отырған XI Республикалық студенттік пәндік олимпиадасының алғашқы аптасының нәтижелері белгілі болды.


«6B02104 – ДӘСТҮРЛІ МУЗЫКАЛЫҚ ӨНЕР» МАМАНДЫҒЫ

«Фольклорлық аспаптар» номинациясы:
I ДӘРЕЖЕЛІ ДИПЛОМ ИЕГЕРІ Жайлауқызы Гүлфайруз
II ДӘРЕЖЕЛІ ДИПЛОМ ИЕГЕРЛЕРІ Уатхан Жұмағали, Айтуарова Нұрай
III ДӘРЕЖЕЛІ ДИПЛОММЕН  ИЕГЕРЛЕРІ Қабышева Жансая, Махшархан Ләйлә, Кенжеғазиева Аяулым

Жыл сайынғы дәстүрге айналған Қазақстан Республикасы Білім және ғылым министрлігі, Қазақстан Республикасы Тұңғыш Президенті – Елбасының қоры, Құрманғазы атындағы Қазақ ұлттық консерваториясының ұйымдастыруымен өтіп жатқан «Өнер» және «Білім» бағытындағы ХI Республикалық студенттік пәндік олимпиада аталған жоғарғы оқу орнында тыңғылықты дайындықпен асыға күтілетін үлкен жоба болып табылады. Биылғы Олимпиада Құрманғазы атындағы Қазақ ұлттық консерваториясының құрылғанына 75 жыл толуына орай және ХХ ғасырдың әйгілі күйші-композиторы Темірбек Ахметовтың 100 жылдық мерейтойына арналғанын атап өткен жөн. Сайысқа төрелік ететін қазылар алқасының да осыған қатысты пікірін біліп, жас орындаушыларға қойылған талаптар мен кеңестерін білу мақсатында «Фольклорлық аспаптар» аталымының төрайымы – өнертану ғылымының магистрі, Құрманғазы атындағы ҚҰК-ның аға оқытушысы Далбағай Гүлфайруз Есімханқызынан сұхбат алуды ұйғардық.
-    Гүлфайруз Есімханқызы, Құрманғазы атындағы Қазақ ұлттық консерваториясының шаңырағында өтіп жатқан Республикалық жас орындаушылар арасындағы олимпиадада «Фольклорлық аспаптар» аталымының төрайымы ретінде қазылар алқасының құрамынан табылуыңыз  заңды. Өйткені, ұзақ жылдар қазақтың үрлемелі музыкалық аспаптарын, оның ішінде қазақтың сазсырнай тектес аспаптарының түр-түрін дамыту мақсатында айтулы еңбектер жазып, бірқатар талантты шәкірттер тәрбиеледіңіз. Биылғы олимпиададан не күтесіз?
-    Фольклорлық аспаптарды шеберлікпен меңгерген жаңа орындаушыларды және үлкен сахнаға беттеген жаңа есімдердің ашылуын күтеміз.
-    Қазақтың фольклорлық музыкалық аспаптарын атағанда этнограф, ғалым Болат Сарыбаевтың орасан зор еңбегін айтпай кетуге болмайды. Өзіңіз бүгінгі жастардың аяқ алысына қарап, этнограф, ғалымның ізбасарларын көресіз бе?
-    Иә, өте керемет және орынды сұрақ. Белгілі ғалым, этнограф, аспаптанушы Болат Сарыбаевтың қазіргі заманда ізбасарлары мүлдем жоқ деп айтуға болмас. Кешегі дүниеден өткен «Сазген сазы»  фольклорлы-этнографиялық ансамблінің белді мүшесі Жаһангер Телғожаев ағамыз нағыз Б. Сарыбаевтың ізбасары еді. Бірақ, әттеген-ай дейміз... Сол кісілердің жолын жалғастырушы жас буын шеберлер, осы қасиетті оқу орнының түлектері – мультиаспапшы Азамат Бақия және сазсырнай класынан бітірген Ержан Мұқышевтарды айтуға болады. Бұл жігіттер өздерінің төл аспаптарын меңгеруімен қатар қыш, саз, қамыс, қурай, ағаш, тері, сүйектен жасалатын музыкалық аспаптар жасаудың қыр-сырын өз беттерінше игеріп, қазіргі сұранысты өтеп келеді. Сондықтан, осы азаматтардың болашағына үлкен үміт артамын.
-    Саз сырнай аспабының кәсіби музыкалық аспап ретінде даму жолында жеткен бүгінгі жетістіктері қандай?
-    Саз сырнай аспабының бүгінгі таңда кәсіби деңгейге жеткен музыкалық аспап ретінде үлкен бір жетістігі ол жоғарғы және арнайы орта білім беру оқу орындарында оқу жүйесіне мамандық пән ретінде енуі. Консерватория шаңырағында фольклорлық аспаптардың арнайы  мамандық ретінде оқытылуына тікелей мұрындық болған, Халық музыкасы факультетінің бұрынғы деканы, ҚР еңбек сіңірген қайраткері, профессор Сахарбаева Карима Сүндетқызының еңбегін айрықша атап өткім келеді, сонымен бірге, оркестр мен ансамбльдердегі халық аспаптары құрамында өзінің орнын ойып алуын айтсам толық болады. Алғаш рет сазсырнайшылар ансамблі құрылып, тастауық, үскірік, құссайрауық, бас сазсырнай т.б. окарина тектес қазақтың үрлемелі ансамблі дүниеге келді. Аспап тарихына байланысты монография жазылып, репертуарына қажетті хрестоматиялар жарық көрді.
-    Қазіргі таңда елімізде фольклорлық аспаптарда орындайтын таланттарға сұраныс едәуір артып келеді. Көне саз сырнай, жетіген, шаң қобыз, дауылпаз, шертер сынды музыкалық аспаптарымыздың трендке айналуының сыры неде деп ойлайсыз? Жастардың қызығушылығын арттыруға түрткі болған факторларға тоқталып кетсеңіз?
-    Дәстүрлі музыкалық аспаптарымыздың трендке айналуы алдымен қазақтың бар болмысын, барлық арман-тілегін шынайы бере алған өз бойынан өсіп шыққан сазды домбыра, қобыз, жетіген, сазсырнай, сыбызғы секілді аспаптарда «күй» деген керемет туынды тудыра алған, тіпті адамнан да артық сөйлете алған талантты тұлғалардың шығуы себеп болды. Сонымен қатар, құрылымы, жасалынуы жағынан ең қарапайым музыкалық аспаптар адамның терең жан-дүниесінің қатпарына сынадай ене алатынын сезініп, Кеңес дәуірінде фольклорлық көне аспаптарға, салт-дәстүрге біраз уақытқа дейін тыйым салынғанына қарамастан, ұлт өз жадында берік сақтау қабілетінің арқасында қайта түлетіп, бүгінгі жастар бойында осы терең генетикалық деңгейдегі жады қайта оянып, құрсауланған сана еркіндікке шығып, ерекше серпіліспен мыңдаған жастарды төл аспаптарында ойнатуға қызығушылығын арттырды. Оған жас ұрпақтың үйренсем деген талпынысы, мемлекет тарапынан қолдауы (Домбыра күні, Домбыра телеарнасы, т.б.), мектептің оқу бағдарламасына қосалқы пән ретінде енуі де үлкен қозғау салып жатыр. Біздің мына студенттік олимпиада ұйымдастырушыларының бірі Қазақстан Республикасы Тұңғыш Президенті – Елбасы қорының еліміздегі шығармашыл жастарға  қолдау жасап жүргенін білеміз. Алдағы уақытта фольклорлық аспаптарға да көңіл бөліп демеушілік танытады деп үміттенеміз.
-    Гүлфайруз Есімханқызы, консерватория қабырғасында талай жылдар аянбай еңбек етіп келесіз. Сіздің сахнаға жиі шығып, мол тәжірибеңіз бен орындаушылық шеберлігіңізді де паш етіп келе жатқаныңызды да көріп, қуанамыз. Өйткені, ол жастарға шабыт берері сөзсіз. Бүгінгі күннің талаптары мен құндылықтарының өзгеріске ұшырап жатқанын ескере отырып, өнерпаз жастардың фольклорлық аспаптарды таңдауда, үйренуде, насихаттауда қандай қағидаларды ұмытпауына кеңес бересіз?
-    Өнерпаз жастар фольклорлық аспаптарды таңдауда, оны үйреніп, насихаттау ісінде алдымен бізге дейінгі бабалар салып кеткен сүрлеу мен дәстүрге, рухани мұраға жанашырлықпен қарап, дамытуға дайын болғанын қалар едім. Сол аға буын ұрпақтың сақтап, қалпына келтіру жолында бастаған, жасаған іргелі де игі істерін іліп алып кететіндей жігерлі де қайратты жастар болуын қалаймын. Шәкірттеріміздің бізден алған білімін әрі қарай дамытып, бізден де жоғары асқаралы шыңдарды бағындыра беруін шынайы көңілмен тілеймін. Ең бастысы, мамандық ретінде таңдап алған аспабын үздік игеріп, өз ісінің айтулы шебері болса және дәстүрлі музыкамыздың өрлеуіне өз үлесін қосса, төл өнеріміздің әлі де биік деңгейге шығары сөзсіз.
-    Сұхбат беріп, боямасыз пікір білдіргеніңіз үшін алғыс айтамыз. Шығармашылығыңызға табыс, отбасыңызға амандық тілейміз!

Сұхбат жүргізген:
Құрманғазы атындағы Қазақ ұлттық консерваториясы
Домбыра кафедрасының оқытушыс, PhD доктор
Ержан Жамеңкеев

     «Музыкалық білім»  беру бағдарламасының студенттері Болатов Айбек, 4-курс (Пак Элеонора Валентиновна) және Найманбаева Айгерім, 2-ші курс (Егимбаева Карлыгаш Булатовна) 2019 жылдың 27-31 наурыз аралығында өткен «Жастар жылына» арналған әртүрлі мамандық студенттеріне арналған фортепиано дайындығы бойынша «EURASIA PIANO FORUM» атты  V Халықаралық конкурсқа алғаш рет қатысты.
    Екі студенттеріміз  жүлделі орындарға ие болды және халықаралық байқаудың жеңімпаздары мен 2-ші орын лауреат  иегерлері атанды!
Байқаудың мақсаты - студенттерге арналған  жалпы фортепиано оқыту деңгейін анықтау; әр түрлі мамандықтардың жас музыканттарының фортепианоға (жеке және ансамбльге) деген қызығушылығын ынталандыру.
Байқаудың мақсаты - пианисттерге емес, жалпы фортепианоға  арналған, студенттердің  оқыту деңгейін анықтау; әр түрлі мамандықтардың жас музыканттарының фортепианоға (жеке және ансамбльге) деген қызығушылығын арттыру. Қатысушылар, клавирлік бароккодан қазіргі заманға дейін және Қазақстан композиторларының әр түрлі фортепианоға арналған шығармаларын орындады.
      Қатысушылардың шеберлігін Қазақстандық пианисттерден басқа Еуропалық музыкалық жоғары оқу орындарының танымал музыканттарынан тұратын беделді қазылар алқасы бағалады, олар: Рафаэль Салинас - ESMUC музыкалық жоғары мектебінің профессоры (Испания), Регина Химмельбауэр - Вена университетінің Джаз және танымал музыка  жөніндегі проректоры JAM MUSIC LAB (Австрия), Мария Луиза Балдассари Дж.Россини консерваториясының профессоры (Италия).
       Құрманғазы атындағы Қазақ Ұлттық консерваториясын,
ВДиМО факультетін, «Музыкалық білім және психология» кафедрасының меңгерушісі – Калиакбарова Ляйля Токеновнаны және кафедра оқытушыларын студенттерінің жүлделі жеңісімен шын жүректен құттықтаймыз!

Ағымдағы жылдың 27 наурызбен 31 наурыз аралығында Нұр-Сұлтан қаласындағы Қазақ ұлттық өнер университетінде V Халықаралық EURASIA PIANO FORUM байқауы өтті..
Байқауға Құрманғазы атындағы Қазақ ұлттық консерваториясының «Фортепиано» кафедрасының студенттері қатысып, жоғарғы дәрежеде өнер көрсетті.
Консерватория студенттері өнер сайысына  «Фортепианода жеке орындаушылық» және «Ансамбльдік орындаушылық» номинациясы бойынша баптары мен бақтарын сынады. Биылғы жылы байқау ҚР Тұңғыш президенті жариялаған «Жастар жылы» аясында өткен.
«Дәстүрлі жарыстың мақсаты – «Міндетті фортепиано» пәнінің төңірегінде фортепианолық орындаушылықпен айналысатын барлық мамандықтағы оқушылар мен студенттердің фортепианода ойнау дайындығының деңгейін анықтау, әр түрлі мамандықтағы жас музыканттарды фортепианолық орындаушылыққа ынталандыру және жастардың қызығушылығын арттыру», – деп атап өтті байқау ұйымдастырушылары.
«Ансамбльдік орындаушылық»  номинациясы бойынша Абдуахап Қымбат пен Құсайынова Салтанат 1-ші орынға ие болды. «Фортепианода жеке орындаушылық» номинациясы бойынша келесі студенттер марапатталды:
3-ші орын иегерлері - Өскенбай Тоғжан, Жаксылыққызы Ару, Сатова Айым, Кәрімқұлова Перизат, Ерман Әсел, Айдын Рания, Қабдуалиев Дәулет.
2-ші орын иегері - Елубаева Дана.
1-ші орын иегерлері - Қайыпова Роза, Артықбаев Нұрбол, Рахымбет Фариза, Төлеутай Баянды
V Халықаралық EURASIA PIANO FORUM байқауының Бас жүлде иегері - Рахымжан Нұрлыхан атанды. Барлық жеңімпаздарды шын жүректен құттықтаймыз!

Ағымдағы жылдың 1 сәуірінде Құрманғазы атындағы Қазақ ұлттық консерваториясында IV Халықаралық камералық музыка фестивалінің ашылуына орай концерт өтті.

Бүгін Қазақстан Республикасы Білім және ғылым министрлігі, Қазақстан Республикасы Тұңғыш Президенті – Елбасының қоры және Құрманғазы атындағы Қазақ ұлттық консерваториясы бірлесіп ұйымдастырып отырған XI Республикалық студенттік пәндік олимпиадасы өз жұмысын бастады! Консерваторияның үлкен концерттік залында олимпиаданың салтанатты түрде ашылуы өтті. Салтанатты жиынды консерватория ректоры Арман Жүдебаев  ашып берді. 

Бүгін Құрманғазы атындағы Қазақ ұлттық консерваториясында Рахат-Би Абдысагин қонақта болып, консерватория студенттеріне шеберлік-сыныбын өткізді.

Рахат-Би – ең жас «Дарын» сыйлығының лауреаты, Қазақстанның Мәдениет қайраткері, ТМД Парламентаралық ассамблеясының «Мәдениет пен өнерге қосқан үлесі үшін» құрмет белгісінің иегері және «Қазақстанның 100 жаңа есім» Ұлттық жобасының жеңімпазы.

Бүгін Құрманғазы атындағы Қазақ ұлттық консерваториясында Наурыз мейрамына арналған «Ұлы күн – Наурыз!» атты мерекелік жиын салтанатты түрде кеңінен аталып өтті. Шараға Алматы қаласындағы бірқатар оқу орындары мен мәдени мекемелердің басшылары және өнер қайраткерлері қатысты. Құттықтау сөзді ҚР халық артисі Нұрғали Нүсіпжанов пен ҚР халық артисі, әнші-композитор Алтынбек Қоразбаев ағаларымыз бастап, ұжым басшысы Арман Жүдебаев келген қонақтарға және мерекеге қатысушы ұзтаздар қауымы мен студенттерге, жиналған көпшілікке өз лебізін білдірді. Мерекелік шараға келген қонақтар ішінде М.Әуезов атындағы Қазақ мемлекеттік академиялық драма театрының директоры Сәбит Әбдіхалықов, С.Асфендияров атындағы ҚазҰМУ ректоры Талғат Нұрғожин, Т.Жүргенов атындағы ҚазҰӨА ректоры Асхат Маемиров, Құрманғазы атындағы Қазақ мемлекеттік академиялық халық аспаптар оркестрінің директоры Нұрғиса Дәуешов, Абай атындағы ҚазҰПУ ректоры Тахир Балықбаев, ҚазҰАУ ректоры Тілектес Есполов, Ж. Елебеков атындағы РЭЦК директоры Мырзахан Қадыров, П.Чайковский атындағы АМК директоры Біржан Хасанғалиев және басқалары да бар. Балалар үйінен шақырылған бірнеше бүлдіршінге қайырымдылық ниетте арнайы сый-сияпаттар жасалды. Қасиетті Қыдыр атаның батасымен басталған концерттік бағдарламада консерватория студенттерінің қатысуымен қазақтың қыз ұзату, беташар, бесікке салу, тұсаукесер сияқты салт-дәстүрлері қойылым түрінде көрсетілді. Ұлттық ойын арқантартыстан кафедрааралық жарыс ұйымдастырылып, жеңімпаздарға дипломдар табысталды. Қазақтың ұлттық тағамдары қойылған мерекелік дастарханға арнайы дайындалған наурыз көже мен палау да тартылды. Жиналған көпшілік шараны ұйымдастырушыларға ризалық көңілмен алғыстарын жаудырды.