Консерватория жаңалықтары

2019 жылдың 25 қыркүйегінде Қазақстан Республикасы Президентінің «Орталық атқарушы органдары басшыларының, әкімдердің, ұлттық жоғары оқу орындары ректорларының халыққа есеп беру кездесулерін өткізу туралы» 2016 жылғы 5 ақпандағы № 190 Жарлығына сәйкес, Құрманғазы атындағы Қазақ ұлттық консерваториясының ректоры Арман Жүдебаевтың халыққа есеп беру кездесуі өтті.

Іс-шараға  ҚР Мәдениет және спорт министрлігі мен Білім және ғылым министрлігінің, Алмалы ауданы әкімі аппаратының өкілдері, ЖОО ректорлары, қаланың басқа да оқу орындарының басшылары, БАҚ өкілдері, университеттің оқытушылары мен студенттері қатысты.

Ректор өз баяндамасында 2018-2019 оқу жылында атқарылған жұмыстарды халыққа таныстырды. Оның ішінде консерваториямыздың «Мюзик» жоғары рейтингтік халықаралық аккредитациялық агенттігінен магистратура мен докторантураға білім беру бағдарламасы мен 2019 жылдың мамыр айында Аккредиттеу мен рейтингілеудің тәуелсіз агенттігінен институционалдық аккредитациядан өткені туралы, консерваториямыздың жұмысын жан-жақты талдап, студенттеріміздің жетістіктері туралы сөз қозғады. Сондай-ақ қараша айында Құрманғазы атындағы Қазақ ұлттық консерваториясының 75 жылдығы кең ауқымда тойланып өтетінін айтты.

«Консерваторияда музыкалық білім саласында білімді сақтау мен жеткізу ісінде бай тәжірибе жинақталған және қазіргі уақытқа дейін біз бұл бағыттың көшбасшысы болып табыламыз. Бұл консерваторияның кәсіби мамандарды дайындау ісіне қосқан үлесімен дәлелденеді. Бүгінгі күні біздің бітірушілеріміз көптеген шығармашылық ЖОО мен музыкалық колледждердің кадрлық құрамын қалыптастырумен қатар еліміздің басты сахналарында өз өнерлерін көрсетуде, жоғары деңгейдегі кәсіби шеберліктерін көрсетіп, елімізді шетелдерге танытуда», - деді сөзінде ректор Арман Жүдебаев.

Ректордың баяндамасы аяқталған соң шара консерваторияның түлектері мен дарынды студенттері қатысқан концертке жалғасты. Олардың ішінде «Хассақ» этно-фольклорлық ансамблі, Оразбай Мадина, домбыра кафедрасының 1 курс студенті Қазкенов Дастан, виолончельшілер ансамблі, Нөсербай Ақжол, Барақбай Бексұлтан, Мырзағалиев Алишер, Ідірбай Байбақты, жетігеншілер ансамблі және консерваторияның аралас хоры өнер көрсетіп, жиналған халықтың қошеметіне бөленді.

Берген Университетімен (Норвегия) бірлесіп жүзеге асырылатын «Музыка және орындаушылық саласындағы Еуразиялық ғылыми-зерттеу қауымдастығы / Music and Artistic Research Knowledge Network Eurasia CPEA-LT-2016/10082») халықаралық жоба аясында келесі мамандықтар бойынша   2019-2020 оқу жылы бір семестр көлемінде (2020ж. қаңтар – мамыр) студенттер мен магистраннтарға қабылдау жарияланады:

Қымбатты достар! Сіздермен қуанышты хабармен бөліскіміз келеді. Қыркүйек айының 14-23 аралығында Абай атындағы Қазақ мемлекеттік академиялық опера және балет театрында, Бибігүл Төлегенованың X Халықаралық вокалистер конкурсы өтті. Италия, Ресей, Әзірбайжан, Өзбекстан, Қырғызстан және Болгария елдерінен қатысқан өнерпаздар арасынан, Құрманғазы атындағы Қазақ ұлттық консерваториясының «Вокалдық өнер» кафедрасының 2 курс студенті Мәдина Оразбай жүлделі 2 орынға ие болды. Жас өнерпазды консерватория ұжымы шын жүректен құттықтайды. ????????????????????????
Айта кетейік, аталмыш конкурс ҚР Мәдениет және спорт министрлігі, Алматы қаласының әкімдігі және «Мирас» қоғамдық ұлттық мәдени қорының ұйымдастыруымен өтті.

2019 жылдың 17 қыркүйегінде Құрманғазы атындағы Қазақ ұлттық консерваториясына Монғолия мемлекеттік консерваториясының вице-директоры Гүлфайруз Шаует ханым келді. Қонақты консерватория ректоры Арман Жүдебаев пен ғылыми жұмыс және халықаралық ынтымақтастық жөніндегі проректор Ғалия Бегембетова қабылдады. Кездесу барысында тараптар екі жақты әріптестік ынтымақтастықты дамытуға уағдаласты.

Бүгін Құрманғазы атындағы Қазақ ұлттық консерваториясының ректоры Арман Жүдебаев Оңтүстік Корея мемлекетінен келген «Халықаралық менталды-ағартушылық орталығының» президенті Ким Дже Хонг бастаған делегациямен кездесті. Аталмыш кездесу барысында екі жақ білім беру саласындағы әріптестіктің маңызды сұрақтары мен ортақ жобаларды іске асыру жолдарын талқылады. Сонымен қатар студенттердің тәрбиесіне баса көңіл бөле отырып, олармен тығыз байланыста жұмыс жүргізу керек екендігі айтылды. Консерватория басшысы әңгіме барысында бұндай серіктестіктің пайдалы болатынына және жақсы нәтиже беретініне сенімді екенін алға тартты.
Айта кетейік, алдағы уақытта Оңтүстік Кореялық «Халықаралық менталды-ағартушылық орталығының» өкілдері консерватория қабырғасында арнайы өнер мен білімді игерудегі студенттердің саналық денгейін көтеріп, заманауи адаптациялық потенциалын нығайтуға бағытталған дәрістер өткізбек.

2019 жылдың 11 қыркүйегінде Құрманғазы атындағы Қазақ ұлттық консерваториясында Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл жөніндегі агенттігінің «Sanaly urpaq» республикалық жобалау кеңсесінің басшысы Қайыржан Ахметбекұлы Тоқышевпен кездесу өтті.

2019 жылдың 11-қыркүйегінде консерватория студенттеріне арналған курарторлық сағат аясында ҚР Президенті Жолдауын талқылаған семинар ұйымдастырылды. Жиынға оқу орнындағы Жастар ісі жөніндегі студенттік комитеті, «Элита» пікірсайыс клубы, «Дебют» студенттік театры, «Born to win» жастар қозғалысы,  сондай-ақ, консерваторияда жаңадан ашылған «Саналы ұрпақ» атты сыбайлас жемқорлыққа қарсы күрес клубы ұйымдары белсенді ат салысты. Семинарда сыбайлас жемқорлыққа қарсы күрес, шағын және орта бизнесті дамыту, бітірушілерді жұмысқа орналастыру сияқты мәселелерге қатысты ақпараттар берілді.

Бүгін Құрманғазы атындағы Қазақ ұлттық консерваториясының ректоры Арман Жүдебаев пен ректор кеңесшісі Ермек Скаков КСРО және Қазақстанның Халық артисі, Құрманғазы атындағы Қазақ ұлттық консерваториясының профессоры Бибігүл Төлегеновамен кездесіп, ардагер ұстаздың биылғы  90 жылдық мерейтойын  консерватория қабырғасында арнайы атап өту үшін ұйымдастырылатын шаралар жөнінде ақылдасты. Өмірін өнермен өрнектеген қазақтың бұлбұл әншісі ректорымыздың бұл ұсынысын қуана қабыл алып, жұмысына сәттілік тілеп, «Қазақ операсының аңыздары» атты жинағын сыйға тартты.

Бүгін Құрманғазы атындағы Қазақ ұлттық консерваториясында Алматы қаласы әкімдігі мен Халықаралық ТҮРІКСОЙ ұйымының бірлескен жобасы «ТҮРІКСОЙ» Жастар камералық оркестрінің концерті өтті.